Hello! awaj jaise kisi geherai se ati hui mere kaano par padi, saans bharte hue mene aankhe mund li, aur ek bund sidhi mere aankho se Zameen ki duri tay karte hue Zameen par jaa giri...Sabse pehele mere ek haseen dost ne use mere phone se msg kiya tha "I think I'm in Love With You". Par 2 din tak uska phone band hone ke kaaran woh paigaam uss tak pohocha hi nahi tha, isliye mene wapas bhej diya yahi soch kar ki agar kuch ho jaye toh me uska sahara lekar jhutla saku. Par jab usne mujhse pucha " What have you just sent me?", toh me khud ko rok naa saka. Pata nahi har baar jab bhi woh mere sath hoti hai me usse kuch chhupa nahi sakta, yaa toh usse woh baat pata chal jati hai yaa toh mein hi bol deta hu. Uske uss sawal ke baad mujhme jaise garmi si bhar gayi thi, mujhe pasina chhut raha tha. Haan! dar tha par iss baat ka nahi ki uska jawab kya hoga, par iss baat ka ki humara Rishta kahi khatam naa ho jaye. Kahi uski awaj mere kaano se dur naa ho jaye, kahi uske Zain me mere liye galatfemi naa ho jaye, kahi uska mujhpar se bharosa naa uth jaye. Aise kayi sawal mere dimag me Dastak de rahe the. "Jo bhi tumne padha woh sab sach hai, bus tumhare jawab ka intazar hai", yeh sab me kaise bol gaya mujhe khud pata nahi chala. Shayad wakt par itafaaq nazair tha isliye itni himmat aa gayi ki sab kehe gaya. Uski awaj ki nami bayaan kar rahi thi ki uska jawab kya hoga. "Par kaise? Hum toh sirf dost the" usne kaha, aur mein chup raha kyuki me jaanta tha par Bekhabar tha ki sach me uske zindagi me koi aur tha. "Yeh mumkin nahi ho sakta" usne kaha, aur fir pehele ki tarah mere gale me kharash ayi aur usi ladkhadati aawaj me mene usse kaha, "Jaanta hu, Mera kaam hai tumse pyaar karna aur uss pyaar ko barkarar rakhna yeh tumhara kaam hai". Yeh kehekar mene phone kaat diya aur ek Aadeeb ki tarah soch me ghul gaya. Kuch din ek alag duniya me jee raha tha mein, jaha subah-raat bewajah mausam badal rahe the, kuch nahi samajh aa raha tha aur ek raat achanak phone par dhun baji jo mujhe naa padhne ke baad bilkul bhi sunai nahi de rahi thi. Ussi ka phone tha, hamesha ki tarah uska naam dekhte hi meri dhadkane mano jaise rail ki raftar se bhi tezz daud rahi thi. "Hello!" uski awaj mere kaano par kareeb 2 hafte baad pad rahi thi, mene bhi usse daurhaya. Paas-e-manzar ek lay me chalti hawa ka shor sunai de raha tha jisse mujhe andaaza aa gaya tha ki woh safar me thi. Dil me yeh sawal hamesha se tha ki woh hamesha safar ke dauraan mujhe hi apna humsafar kyu banana pasand karti thi par dil ko ek sukun mila yeh soch kar ki ab bhi woh mujhe apna humsafar maanti hai. Mene uss din uss sawal ke jawab ko janane ki koshish ki, " kyu hamesha safar ke dauraan mujhe hi humsafar banati ho?". "Pata nahi..." uska yeh jawab sunkar me duwidha me tha ki agar iske zindagi me koi aur hai toh yeh mujhe ussi wakt kyu apna humsafar banana chahati hai jab woh sabse akeli hoti hai. Par me khush tha ki usse meri parwah hoti hai aur woh mujhse dur hone ke Ehsaas ko samajhti hai. Uss raat me khud se Mukhatib hua aur hamesha ki tarah me raat bhar soo nahi paya kyuki woh safar me thi aur mera dil ussi me atka baitha tha. Agli subah jab mene phone par dekha toh ussi ka paigaam tha "I'm so worried, I'm not able to stop crying..." isse padh kar mere sir me ek chamak si nikli thi aur jab mene phone lagaya toh Sisakte sisakte woh kuch aisa kehe gayi ki mere Aankh apne aap gili ho gayi. Usse kisi ki itni fikar karte dekhna mere liye ek aisa mukaam tha ki me usse dur rahu toh hi behetar hoga. Isliye mene uss din se faisla kar liya tha ki naa toh me usse baat karunga naa hi usse koi Raabta rakhunga. Uss din ke baad uske kayi paigaam aye aur kayi dafa usne mujhse raabta rakhne ki koshish ki par mein nahi chahata tha ki meri wajah se usse koi pareshani ho isliye mene kisi baat ki aur dhyan naa dete hue usse nazarandaaz kar diya. Bus kabhi kabhi uski aawaj sunne ke liye road ke kisi mood wale Coin-Box par se aawaj sun liya karta tha, darta tha kahi woh pehechaan naa le. 8 mahine beet gaye the uss baat ko jab mene usse Haal-e-dil baya kiya tha. Aur roz dube armaano par jee raha tha mein aur issi baat ko dauhra raha tha ki usse iss baat ka ehsaas hoga ki kuch baate sirf kuch logo ke liye bani hoti hai aur uska matlab bhi unhi ke saath milta hai.
Saal ka dusra mahina aur bayaan karne ke thik 8 mahine baad achanak uska naam mere phone par chalak raha tha, 8 mahine baad ussi umid me mene phone ka jawab diya. "Hello!" uski awaj se jaise mera dil bhar aya, mene phone kaat diya aur kuch pal chupke se roo liya. Fir uska phone aya aur iss dafa mene jawab diya, itne arse baad usse Rubaru hone ka mauka mila tha. Aur uss dauraan jo baatein hui wohi shayad mere zindagi ka behad kimti aur ahem hissa tha, uss ek Guftagoo ne hume fir milne ka mauka de diya. Uss mulakat ke liye mene aur mere dosto ne kayi tayariya kar rakhi thi. Par uss haseen mauke par bhi usse uska wakt uss insaan ne Na-ashna kar rakha tha, dard toh mujhe bhi hua tha par uske saath hone ki khushi bhi thi. Taaro se bhara aasman ke tale hum dono kisi shaant samandar ki tarah ek dusre ki saaso ko mehsus kar rahe the. 10 inch ke faasle par baithe the fir bhi khayalo se jude the, itni baate sameti jui thi dil me jo uss din keheni thi par jubaan jaise kat chuki thi. Dhire se usne uska haath mere hathon par rakha, aisa laga raha tha ki me uss haath ko thaam kar puri zindagi ki duri tay kar chuka tha. Uski iss paari si harkat se mujhe hausala mila sab bayaan karne ka, usse unn 8 mahino ke har pal ke bare me bataya jo mene uske bina uske khayalo me kaate. Uss raat jo bhi mene kaha woh mujhe toh yaad nahi par usse jarur yaad hai, usse woh har ek harkat yaad hai jo mene uss dauraan ki thi. "I don't wanna go away from you..." in lafzo ke sahare usne uske Ehsaas bayaan kiye, mere khushi ka koi ant nahi tha. Aur mujhe khushi iss baat ki nahi thi ki mene usse paa liya hai par uss baat ki khushi thi ki me uss ladki ke sath hu jo kisi ki parwah naa karte hue mere liye itne bade imtehaan ka faisla ek pal me kar gayi. Aise ladki ka sath ho toh insaan kisi bhi mushkil ko gale lagane ke liye nahi zhizhagta. Aur issi tarah Aaj bhi hum ek dusre ki baato ko samajhte hai aur kehene se pehele hi aanke padh lete hai.
Isiliye mein hamesha keheta hu "Pyaar Diya Jata Hai, Manga Nahi Jata!"...
No comments:
Post a Comment